Евроамбасадорот Ерван Фуере како загрижувачка ја оценува состојбата со големиот број азиланти од Липковско во Белгија.
- Оваа состојба е навистина загрижувачка и како резултат на тоа целиот регион ќе биде посетен од премиерот на Белгија.

Ги цениме заложбите на Министерството за внатрешни работи, но треба да се вложат уште дополнителни напори за да се спречат туристичките агенции да ја злоупотребуваат довербата на луѓето и да им нудат патувања во земјите на ЕУ, бидејќи сето тоа е во спротивност со духот на визната либерализација доколку се врши злоупотреба, изјави евроамбасадорот Фуере, одговарајќи на новинарско прашање по потпишувањето на Повеќегодишната спогодба за финансирање 2007 – 2010 за ИПА Компонента 5 – Рурален развој во Владата на Република Македонија.

Тој очекува Владата да направи напори за подобрување на економскиот развој и можностите во маргинализираните заедници, како и за подорување на инфраструктурата и отворање нови работни места во Липково и Арачиново.
- Сепак тоа не претставува никакво оправдување за луѓето да ги напуштаат нивните земји за да бараат работа на црно во земјите членки на Европската унија. Ја цениме и изјавата на премиерот Никола Груевски кој кажа дека ќе се преземат дополнителни мерки за спречувањето на појавата на азиланти од Македонија во ЕУ, нагласи Фуере.