Билатералната соработка меѓу Република Македонија и САД беа главна тема на  средба на премиерот Никола Груевски со заменик државниот секретар на САД Џејмс Стајнберг.

- Разговаравме за билатералните односи меѓу Македонија и САД и добрата соработка што ја имаме. Америка е нашиот стратешки партнер и соработката меѓу нас е одлична. САД ја поддржуваат Македонија и заеднички учествуваме во неколку меѓународни мировни мисии, а пријателството и соработката ќе ја продолжиме и понатаму, рече премиерот Груевски по средбата со Стајнберг во Скопје.

Премиерот посочи дека се надева оти долгогодишната соработка меѓу двете земји ќе резултира со полноправно членство на Македонија во НАТО.

На средбата, како што кажа Груевски, било разговарано за повеќе прашања во земјата и во регионот, а меѓу другото и за проблемот со името наметнат од Грција. Разговорите за изнаоѓање на решение, како што истакна, ќе продолжат по изборите кај јужниот сосед.

Заменик државниот секретар Стајнберг рече дека неговата посета е во функција на зајакнување и потврдување на билатерална соработка меѓу двете земји и изрази благодарност за поддршката на Македонија во мисиите во Ирак, Авганистан, Либан и Босна и Херцеговина.

- Со премиерот разговаравме како да ги надминеме разликите кои постојат и да ја осигураме економската и политичката иднина на Македонија, изјави заменик државниот секретар на САД.

 На новинарско прашање  дали посетата на Скопје е дел од обновениот интерес на САД за решевање на прашањето поврзано со името и дали има некакви директни пораки за надминување на спорот, Стајнберг истакна дека САД ги поддржуваат напорите на медијаторот Метју Нимиц за да им помогне на Македонија и Грција да стигнат до заедничко прифатливо решение.

Нашата главна улога е да го поддржуваме процесот и да ги охрабруваме двете страни за да дојдат до заедничко разрешување на проблемот, изјави тој.

Попладнево заменик државниот секретар на САД Џејмс Стајнберг беше примен и од претседателот на Република Македонија Ѓорге Иванов.