|
Околу илјада матуранти од сите средни училишта во Скопје точно напладне танцуваа на плоштадот „Пела“, учествувајќи истовремено со своите врсници од уште шест земји во Матурската парада 2009. Квадрилот на Штраусовата опера „Лилјакот“ го играа заедно со матурантите од околу 40 градови во Словенија, Хрватска, Босна и Херцеговина, Црна Гора, Србија и Бугарија. - Скопје покажа дека е дел од една голема културна манифестација која, се надеваме, догодина ќе биде уште помасовна, изјави скопскиот градоначалник Коце Трајановски. Тој им ја честиташе матурата и им посака среќна иднина, труд и успех, со кои, како што рече, ќе и помогнат на Македонија во нејзиниот развој. Покрај во главниот град, матурски танц денеска имаше и во Струмица, Велес, Охрид, Радовиш и во Валандово. Матурантите ги поздрави и евроамбасадорот Ерван Фуере, кој им посака весел живот како денешниот ден. Манифестацијата е иницирана во 2001 година од Словенецот Томаж Амброж и неговата танц-школа „Уршка“. Покрај забава и новина во одбележувањето на матурата, таа е и трка за Гинисов рекорд во синхронизирано танцување. Бројот на танчери се зголемува секоја година и минатата достигна 27.040 младинци. За да се исполни условот за истовремена игра, Македонското радио - Радио Скопје сателитски ја презеде музиката од Радио Сло Вал 202.
Организатори на Матурската парада во Македонија се Дирекцијата за култура и уметност - Скопје и Танцовиот клуб „Ритам плус“. Покровител на настанот е Агенцијата за млади и спорт.
|
