Легендата на светската музика и филм, славниот француски шансониер  Шарл Азнавур денеска ќе допатува во Македонија.

По пристигнувањето тој ќе биде гостин на „Пивара“ Скопје,  каде што ќе му биде предадено јубилејно пиво. Поводот е што и Азнавур и  брендот „Скопско“ одбележуваат 85 години.

Попладнево Азнавур ќе биде примен од премиерот Никола Груевски, а на средбата, како што соопшти владината прес-служба, ќе присуствуваат и министерката за култура Елизабета Канческа - Милевска и амбасадорот на Француската Република во Македонија Бернард Валеро.

Во рамки на посетата вечер во Кинотеката на Македонија францускиот шансониер ќе биде прогласен за почесен професор (doctor honoris causa) на Универзитетот за аудиовизуелни уметности ЕСРА Париз-Скопје-Њујорк.

На свеченоста ќе биде промовирано и ексклузивното издание на неговите песни „Интимна антологија“. Досега тие се преведни на голем број светски јазици, а кај нас првпат се препеани и преведни од  Маргарита Терезијан-Маленкова и Лилјана Котевска-Плевнеш. 

Беседа за творештвото на Азнавур ќе одржи ректорот на Универзитетот Јордан Плевнеш, а во музичкиот дел ќе настапат Зоран Џорлев и групата „Фолтин“.