Вицепремиерот за европски прашања, Ивица Боцевски поднесе оставка со образложение дека неговиот придонес во Владата бил исцрпен.

„Секоја генерација има своја битка за Македонија, а на мојата генерација и припаѓа обврската да се избори за европска и евро-атлантска Македонија. Јас ја имав должноста да бидам предводник на овој генерациски проект во Вашата Влада, што за мене претставуваше врвен патриотски чин.

Сепак, мојот придонес во актуелната Влада веќе е целосно исцрпен и затоа Ве известувам дека денеска поднесувам неотповиклива оставка на функцијата заменик на претседателот на Владата на Република„ се вели во текстот на оставката на Боцевски.

Неочекуваната оставка на вицепремиерот Боцевски предизвика и први реакции од политичките партии. Илија Димовски од ВМРО-ДПМНЕ рече дека Боцевски поденсол оставка поради лични причини.
„Длабоко ги разбираме и почитуваме личните причини за поднесување на оставката на заменик претседателот на Владата, Ивица Боцевски. Задоволни сме и му благодариме за досегашната соработка останува во наредниот период да соработуваме на други различни различни нивоа на кои можеме да соработуваме“ изјави Димовски.

Цветанка Иванова, координатор на пратеничката група на СДСМ рече дека фактот што три години по ред Македонија добива негативни оценки од Брисел што се однесува на напредокот на земјата кон европските интеграции и неисполнувањето на критериумите поради кои сеуште не се сме добиле датум за започнување на преговорите со ЕУ, се причини што вицепримерот Боцевски поднесол оставка.