Додека се очекуваат резултатите дали четиригодишното дете кое во петокот беше хоспитализирано на клиниката за инфективни болести има грип А од поттипот Х1Н1, во државава пристигна апаратот „Real time PCR“ со кој ќе може да брзо и ефикасно да се индентификува новиот грип.

Лекарите откако ќе земат примероци од случаите за кои се сомневаат дека се заболени од новиот грип, ќе може по брза постапка и во кус временски период да добијат првични резултати.

Директорот на Републичкиот завод за здравствена заштита Азис Положани вели дека освен анализиата во државата, земените примероци повторно ќе се препраќаат и во лабoраторијата во Лондон за да се избегнат евентуалните грешки.

„Материјалот што ние вчера го изолиравме го испративме и на дополнителна сигурносна проверка и во лабораторијата во Софија. Во иднина сигурно дека со овој апарат ќе бидеме во можност да ги определеуваме сите типови на инфлуенца А, како и сите поттипови како Х1Н1. Но, за потврда на истиот и крајниот збор ќе мора да го кажат од лабараторијата во Лондон“ вели Положани.

Од клиниката за инфективни болести велат дека место за паника нема, иако поради годишните летни одмори не ја исклучуваат можноста од епидемија во државава.

„Не можеме да кажеме дека болеста нема да се појави во поголем број, наспроти тоа очекуваме дека ќе се зголемува. Но, нашите обиди во овој момент се насочени на следна фаза на мерки како ублажување на последиците од овие вируси“ рече Звонко Миленковиќ, директор на Клиниката за инфективни болести.