Пратеникот Владо Бучковски му ги предаде денеска на јавниот обвинител Љупчо Шврговски доказите за двојната плата која неколку месеци ја земал министерот за правда Михајло Маневски.

И плата и пензија земале и пратениците Андов и Дулиќ, но тие тврдат оти навреме реагирале кај надлежните органи

Пратеникот на СДСМ Владо Бучковски денеска до Јавното обвинителство достави докази, со кои, според него, се потврдува дека министерот за правда Михајло Маневски во првите четири месеци годинава примал и плата и пензија. Според Бучковски оваа афера на министерот Маневски најмалку треба да заврши со политичка одговорност, бидејќи како што истакна Бучковски, ако Маневски како министер за правда не ги почитува законите тогаш не може да се зборува за функционирање на правната држава.

„Уверен сум дека Јавното обвинителство сериозно ќе пристапи кон разгледување на понудените документи, убеден сум оваа афера треба пред се да заврши со политичка одговорност на најповиканиот, а тоа е министерот за правда. Ако министерот за правда или како што јас викам за неправда промовира непочитување на законите тогаш како ќе говориме за функционирање на правната дсржава“ изјави Бучковски.

„Јас не знам што господинот Бучковски доставил до Јавниот обвинител, но очигледно господинот Бучковски не знам од кои мотиви постапува, но очигледно е дека неосновано сака да манипулира и да дискредитира.

Не сум го оштетил фондот со ништо мислам дека не може да поднесе ништо што би било на моја штета заради тоа што јас и тоа што ми следувало во 2007 и 2008 година не сум го добил“ рече министерот  Маневски.

Специјалниот претставник на Европската комисија во државава, Ерван Фуере, денеска изјави дека и понатаму останува во Македонија.

Овие негови коментари доаѓаат по денешни медиумски информации во јавноста дека дел од државниот врв настојува по неговиот мандат, да заврши и оваа специјална мисија на ЕУ, која е воспоставена во Македонија од времето на конфликтот во 2001 година.

„Секоја одлука околу мандатот на специјалниот претставник на ЕУ е прашање на земјите-членки во Брисел, а не на некој тука. Така што, јас продолжувам да работам со мојот мандат, нè чека многу работа и ќе ја користам сета моја енергија за да го исполнам мојот актуелен мандат. Некои присуството на нашата мисија го поврзуваат со присуство во земја каде има криза.

Тоа не е вистина. Специјалниот претставник на ЕУ е тука само да поддржува, да советува, да помага и да ги охрабрува сите реформи кои се потребни за една држава-кандидат каква што е Македонија.“